ਉੱਤਰ ਪ੍ਰਦੇਸ਼ – ਯੋਗੀ ਆਦਿੱਤਿਯਨਾਥ ਸਰਕਾਰ ਦੇ ਅੱਜ ਢਾਈ ਸਾਲ ਪੂਰੇ ਹੋ ਗਏ| ਇਸ ਮੌਕੇ ਮੁੱਖ ਮੰਤਰੀ ਯੋਗੀ ਨੇ ਕਿਹਾ ਕਿ ਬੀਤੇ ਇਨ੍ਹਾਂ ਸਾਲਾਂ ਵਿੱਚ ਲੋਕਾਂ ਦਾ ਨਜ਼ਰੀਆ ਬਦਲਿਆ ਹੈ| ਕੰਮਕਾਜ ਦੀ ਬਦੌਲਤ ਉਨ੍ਹਾਂ ਦੀ ਸਰਕਾਰ ਨੇ ਜਨਤਾ ਦਾ ਵਿਸ਼ਵਾਸ ਹਾਸਲ ਕੀਤਾ ਹੈ| ਯੋਗੀ ਨੇ ਆਪਣੀ ਸਰਕਾਰ ਦੀਆਂ ਉਪਲੱਬਧੀਆਂ ਦੱਸਦੇ ਹੋਏ ਕਿਹਾ ਕਿ ਸਾਡੀ ਸਰਕਾਰ ਨੇ ਵਰਕ ਟੀਮ ਦੇ ਰੂਪ ਵਿੱਚ ਕੰਮ ਕਰਦੇ ਹੋਏ ਉੱਤਰ ਪ੍ਰਦੇਸ਼ ਦੇ ਪ੍ਰਤੀ ਬਣੇ ਨੈਗੇਟਿਵ ਧਾਰਨਾ ਨੂੰ ਬਦਲਿਆ| 14 ਸਾਲ ਦੇ ਬਨਵਾਸ ਤੋਂ ਬਾਅਦ 19 ਮਾਰਚ 2017 ਨੂੰ ਪ੍ਰਦੇਸ਼ ਵਿੱਚ ਭਾਜਪਾ ਦੀ ਸਰਕਾਰ ਬਣੀ ਸੀ| ਉਦੋਂ ਸਾਡੀ ਸਰਕਾਰ ਦੇ ਸਾਹਮਣੇ ਹਰ ਖੇਤਰ ਵਿੱਚ ਚੁਣੌਤੀਆਂ ਸਨ ਪਰ ਅਸੀਂ ਮੁਸ਼ਕਲਾਂ ਨੂੰ ਮੌਕੇ ਵਿੱਚ ਬਦਲ ਕੇ ਇੱਥੇ ਸੁਸ਼ਾਸਨ ਲਿਆਉਣ ਦੀ ਕਾਮਯਾਬੀ ਪਾਈ| ਯੋਗੀ ਨੇ ਕਿਹਾ ਕਿ ਢਾਈ ਸਾਲ ਦੇ ਕਾਰਜਕਾਲ ਨੇ ਯੂ.ਪੀ. ਤੋਂ ਪਛਾਣ ਦੇ ਸੰਕਟ ਨੂੰ ਖਤਮ ਕੀਤਾ| ਸ਼ਾਸਨ ਦੀ ਭਰੋਸੇਯੋਗਤਾ ਵਧੀ, ਸਾਰੇ ਮੰਤਰੀਆਂ ਨੇ ਬਿਹਤਰ ਕੰਮ ਕਰਨ ਦੀ ਕੋਸ਼ਿਸ਼ ਕੀਤੀ|