ਜਿੱਤ ਮਗਰੋਂ ਬੰਗਲਾਦੇਸ਼ ਦਾ ਵਤੀਰਾ ਗਲਤ ਸੀ: ਗਰਗ

ਭਾਰਤੀ ਅੰਡਰ-19 ਕ੍ਰਿਕਟ ਟੀਮ ਦੇ ਕਪਤਾਨ ਪ੍ਰਿਯਮ ਗਰਗ ਨੇ ਕਿਹਾ ਕਿ ਪਹਿਲਾ ਅੰਡਰ-19 ਕ੍ਰਿਕਟ ਵਿਸ਼ਵ ਕੱਪ ਜਿੱਤਣ ਮਗਰੋਂ ਬੰਗਲਾਦੇਸ਼ ਦੇ ਖਿਡਾਰੀਆਂ ਦਾ ਵਿਵਹਾਰ ਗਲਤ ਸੀ। ਐਤਵਾਰ ਨੂੰ ਫਾਈਨਲ ਵਿੱਚ ਭਾਰਤ ਨੂੰ ਹਰਾਉਣ ਮਗਰੋਂ ਕੁਝ ਬੰਗਲਾਦੇਸ਼ੀ ਕ੍ਰਿਕਟਰਾਂ ਨੇ ਜਿੱਤ ਦੇ ਜਸ਼ਨ ਮਨਾਉਣ ਸਮੇਂ ਸਾਰੀਆਂ ਹੱਦਾਂ ਪਾਰ ਕਰ ਦਿੱਤੀਆਂ ਸਨ। ਹਾਲਾਂਕਿ ਬੰਗਲਾਦੇਸ਼ ਦੇ ਕਪਤਾਨ ਅਕਬਰ ਅਲੀ ਨੇ ਇਸ ‘ਅਣਸੁਖਾਵੀਂ ਘਟਨਾ’ ਲਈ ਮੁਆਫ਼ੀ ਵੀ ਮੰਗੀ।ਭਾਰਤੀ ਕਪਤਾਨ ਪ੍ਰਿਯਮ ਗਰਗ ਨੇ ਕਿਹਾ ਕਿ ਇਸ ਤਰ੍ਹਾਂ ਦੀ ਘਟਨਾ ਨਹੀਂ ਸੀ ਹੋਣੀ ਚਾਹੀਦੀ। ਗਰਗ ਦੇ ਹਵਾਲੇ ਨਾਲ ‘ਕ੍ਰਿਕਇੰਫੋ’ ਨੇ ਕਿਹਾ, ‘‘ਅਸੀਂ ਸਹਿਜ ਸੀ। ਇਹ ਖੇਡ ਦਾ ਹਿੱਸਾ ਹੈ। ਕਦੇ ਤੁਸੀਂ ਜਿੱਤੇ ਹੋ ਅਤੇ ਕਦੇ ਹਾਰਦੇ ਹੋ। ਉਨ੍ਹਾਂ ਦੀ ਪ੍ਰਤੀਕਿਰਿਆ ਗੰਦੀ ਸੀ। ਅਜਿਹਾ ਨਹੀਂ ਹੋਣਾ ਚਾਹੀਦਾ ਸੀ ਪਰ ਠੀਕ ਹੈ, ਚੱਲਦਾ ਹੈ।’’ ਮੈਚ ਦੌਰਾਨ ਵੀ ਬੰਗਲਾਦੇਸ਼ ਖਿਡਾਰੀ ਕਾਫੀ ਹਮਲਾਵਰ ਸਨ ਅਤੇ ਜਦਕਿ ਉਨ੍ਹਾਂ ਦੇ ਤੇਜ਼ ਗੇਂਦਬਾਜ਼ ਸ਼ਰੀਫੁਲ ਇਸਲਾਮ ਨੇ ਹਰ ਗੇਂਦ ’ਤੇ ਭਾਰਤੀ ਬੱਲੇਬਾਜ਼ਾਂ ਨਾਲ ਟਿੱਪਣੀਆਂ ਕੀਤੀਆਂ। ਜੇਤੂ ਦੌੜ ਲੈਣ ਮਗਰੋਂ ਵੀ ਉਸਦਾ ਰਵੱਈਆ ਅਜਿਹਾ ਹੀ ਸੀ।ਦੂਜੇ ਪਾਸੇ ਬੰਗਲਾਦੇਸ਼ ਦੇ ਕਪਤਾਨ ਅਕਬਰ ਅਲੀ ਨੇ ਕਿਹਾ, ‘‘ਜੋ ਹੋਇਆ, ਉਹ ਨਹੀਂ ਹੋਣਾ ਚਾਹੀਦਾ ਸੀ। ਮੈਨੂੰ ਨਹੀਂ ਪਤਾ ਅਸਲ ਵਿੱਚ ਕੀ ਹੋਇਆ। ਫਾਈਨਲ ’ਚ ਜਜ਼ਬਾਤ ਉੱਭਰ ਆਉਂਦੇ ਹਨ ਅਤੇ ਕਈ ਖਿਡਾਰੀਆਂ ਦਾ ਉਸ ’ਤੇ ਕਾਬੂ ਨਹੀਂ ਰਹਿੰਦਾ। ਉਨ੍ਹਾਂ ਕਿਹਾ ਕਿ ਨੌਜਵਾਨ ਖਿਡਾਰੀਆਂ ਨੂੰ ਇਸ ਤੋਂ ਬਚਣਾ ਚਾਹੀਦਾ ਹੈ। ਸਾਨੂੰ ਵਿਰੋਧੀ ਦਾ ਸਨਮਾਨ ਕਰਨਾ ਚਾਹੀਦਾ ਹੈ। ਕ੍ਰਿਕਟ ‘ਭੱਦਰ ਪੁਰਸ਼ਾਂ’ ਦੀ ਖੇਡ ਹੈ। ਮੈਂ ਆਪਣੀ ਟੀਮ ਵੱਲੋਂ ਮੁਆਫ਼ੀ ਮੰਗਦਾ ਹਾਂ।’’ ਅਲੀ ਨੇ ਕਿਹਾ, ‘‘ਭਾਰਤ-ਬੰਗਲਾਦੇਸ਼ ਦੀ ਮੁਕਾਬਲਾ ਅਜਿਹਾ ਹੀ ਹੈ। ਅਸੀਂ ਪਿਛਲੇ ਏਸ਼ੀਆ ਕੱਪ ਫਾਈਨਲ ’ਚ ਉਨ੍ਹਾਂ ਤੋਂ ਹਾਰੇ ਸੀ ਅਤੇ ਮੈਨੂੰ ਲੱਗਦਾ ਹੈ ਕਿ ਕਿਤੇ ਬਦਲੇ ਦੀ ਗੱਲ ਖਿਡਾਰੀ ਜ਼ਿਹਨ ਵਿੱਚ ਸੀ।