ਦਲਾਈ ਲਾਮਾ ਦੇ ਜਾਨਸ਼ੀਨ ਦਾ ਮੁੱਦਾ ਯੂਐੱਨ ’ਚ ਵਿਚਾਰਿਆ ਜਾਵੇ: ਅਮਰੀਕਾ

ਚੀਨ ਵੱਲੋਂ 84 ਸਾਲਾਂ ਨੂੰ ਢੁੱਕੇ ਦਲਾਈ ਲਾਮਾ ਦੇ ਜਾਨਸ਼ੀਨ ਬਾਰੇ ਫੈਸਲਾ ਕੀਤੇ ਜਾਣ ਦੇ ਦਾਅਵਿਆਂ ਦਰਮਿਆਨ ਅਮਰੀਕਾ ਨੇ ਅੱਜ ਕਿਹਾ ਕਿ ਸੰਯੁਕਤ ਰਾਸ਼ਟਰ ਸਮੇਤ ਹੋਰਨਾਂ ਕੌਮਾਂਤਰੀ ਸੰਸਥਾਵਾਂ ਨੂੰ ਆਪਣੇ ਪੱਧਰ ’ਤੇ ਇਹ ਮੁੱਦਾ ਵਿਚਾਰਨਾ ਚਾਹੀਦਾ ਹੈ। ਚੇਤੇ ਰਹੇ ਕਿ ਚੀਨ ਲਗਾਤਾਰ ਇਹ ਗੱਲ ਆਖ ਰਿਹਾ ਹੈ ਕਿ ਦਲਾਈ ਲਾਮਾ ਦਾ ਜਾਨਸ਼ੀਨ ਨਿਰਧਾਰਿਤ ਕੀਤੇ ਜਾਣ ਮੌਕੇ ਉਹਦੀ ਸਹਿਮਤੀ ਲਾਜ਼ਮੀ ਹੋਵੇਗੀ।ਕੌਮਾਂਤਰੀ ਧਾਰਮਿਕ ਆਜ਼ਾਦੀ ਬਾਰੇ ਅਮਰੀਕੀ ਰਾਜਦੂਤ ਸੈਮੂਅਲ ਬਰਾਊਨਬੈਕ ਨੇ ਇਥੇ ਪ੍ਰੈੱਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਕਿਹਾ, ‘ਕਈ ਲੋਕ ਹਨ ਜੋ ਦਲਾਈ ਲਾਮਾ ਦੇ ਸ਼ਰਧਾਲੂ ਹਨ, ਪਰ ਉਹ ਚੀਨ ਵਿੱਚ ਨਹੀਂ ਰਹਿੰਦੇ। ਉਹ ਵਿਸ਼ਵ ਭਰ ਵਿੱਚ ਮਕਬੂਲ ਅਧਿਆਤਮਕ ਆਗੂ ਹੈ ਤੇ ਮਾਣ ਸਤਿਕਾਰ ਦਾ ਹੱਕਦਾਰ ਹੋਣ ਦੇ ਨਾਲ ਆਪਣੇ ਹੀ ਭਾਈਚਾਰੇ ਤੇ ਮੱਤ ’ਚੋਂ ਆਪਣਾ ਜਾਨਸ਼ੀਨ ਚੁਣਨ ਦਾ ਹੱਕ ਵੀ ਰੱਖਦਾ ਹੈ…।’ ਅਮਰੀਕੀ ਸਫ਼ੀਰ ਨੇ ਚੀਨ ਦੇ ਉਪਰੋਕਤ ਦਾਅਵੇ ਨੂੰ ਖਾਰਜ ਕਰਦਿਆਂ ਕਿਹਾ ਕਿ ਇਹ ਅਜਿਹਾ ਮੁੱਦਾ ਹੈ, ਜਿਸ ਨੂੰ ਸੰਯੁਕਤ ਰਾਸ਼ਟਰ ਸਮੇਤ ਹੋਰਨਾਂ ਕੌਮਾਂਤਰੀ ਸੰਸਥਾਵਾਂ ਵਿੱਚ ਵਿਚਾਰਿਆ ਜਾਣਾ ਚਾਹੀਦਾ ਹੈ।