ਕਾਠਮੰਡੂ – ਨੇਪਾਲ ਦੇ ਇਕ ਹੋਟਲ ਵਿੱਚੋਂ 8 ਭਾਰਤੀਆਂ ਦੀਆਂ ਲਾਸ਼ਾਂ ਬਰਾਮਦ ਹੋਈਆਂ ਹਨ| ਪ੍ਰਾਪਤ ਜਾਣਕਾਰੀ ਅਨੁਸਾਰ ਸਥਾਨਕ ਪੁਲੀਸ ਨੇ ਦਮਨ ਹੋਟਲ ਵਿੱਚੋਂ ਕੇਰਲ ਦੇ ਸੈਲਾਨੀਆਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਹਨ| ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ ਮੌਤ ਦਾ ਕਾਰਨ ਗੈਸ ਹੀਟਰ ਦੱਸਿਆ ਜਾ ਰਿਹਾ ਹੈ|ਪ੍ਰਾਪਤ ਜਾਣਕਾਰੀ ਮੁਤਾਬਕ ਕੇਰਲ ਤੋਂ 15 ਵਿਅਕਤੀਆਂ ਦਾ ਸਮੂਹ ਪੋਖਰਾ ਘੁੰਮਣ ਆਇਆ ਸੀ| ਇਹ ਲੋਕ ਵਾਪਸ ਕੇਰਲ ਜਾਣ ਵਾਲੇ ਸਨ ਅਤੇ ਰਾਤ ਨੂੰ ਇੱਥੇ ਰੁਕੇ ਸਨ| ਮ੍ਰਿਤਕਾਂ ਵਿੱਚ ਦੋ ਵਿਆਹੇ ਜੋੜੇ ਅਤੇ ਚਾਰ ਬੱਚੇ ਸ਼ਾਮਲ ਹਨ| ਇਨ੍ਹਾਂ ਨੇ ਕਮਰੇ ਨੂੰ ਗਰਮ ਕਰਨ ਲਈ ਗੈਸ ਹੀਟਰ ਚਾਲੂ ਕੀਤਾ ਸੀ ਤੇ ਇਸੇ ਕਾਰਨ ਉਨ੍ਹਾਂ ਦਾ ਸਾਹ ਘੁੱਟ ਗਿਆ| 15 ਵਿਅਕਤੀਆਂ ਨੇ ਕੁੱਲ ਚਾਰ ਕਮਰੇ ਬੁੱਕ ਕਰਵਾਏ ਸਨ, ਉਨ੍ਹਾਂ ਵਿੱਚੋਂ 8 ਇਕ ਕਮਰੇ ਵਿੱਚ ਰੁਕੇ ਸਨ ਅਤੇ ਬਾਕੀ ਹੋਰ ਕਮਰਿਆਂ ਵਿੱਚ ਸਨ| ਉਨ੍ਹਾਂ ਨੂੰ ਹਸਪਤਾਲ ਲੈ ਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਘੋਸ਼ਿਤ ਕੀਤਾ| ਮ੍ਰਿਤਕਾਂ ਦੀ ਪਛਾਣ ਪਰਬੀਨ ਕੁਮਾਰ ਨਾਇਰ(39), ਸ਼ਰਾਇਨਾ(34), ਰਣਜੀਤ ਕੁਮਾਰ(39), ਇੰਦੂ ਰਣਜੀਤ (34), ਸ਼੍ਰੀ ਭਾਦਰਾ(9), ਅਬੀਨਵ ਸਰੋਆ(9) ਅਬੀ ਨਾਇਰ(7) ਅਤੇ ਬੇਸ਼ਨਬ ਰਣਜੀਤ (2) ਵਜੋਂ ਹੋਈ ਹੈ|