ਟੋਕੀਓ – ਕੋਰੋਨਾਵਾਇਰਸ ਨਾਲ ਪ੍ਰਭਾਵਿਤ ਚੀਨ ਦੇ ਵੁਹਾਨ ਸ਼ਹਿਰ ਤੋਂ ਜਾਪਾਨ ਦੇ ਲੋਕਾਂ ਦੇ ਪਹਿਲੇ ਸਮੂਹ ਨੂੰ ਲੈ ਕੇ ਇਕ ਜਹਾਜ਼ ਅੱਜ ਟੋਕੀਓ ਵਾਪਸ ਪਹੁੰਚਿਆ| ਜਹਾਜ਼ ਵਿੱਚ ਲਿਆਂਦੇ ਗਏ 206 ਲੋਕਾਂ ਵਿਚੋ 4 ਖੰਘ ਅਤੇ ਬੁਖਾਰ ਨਾਲ ਪੀੜਤ ਹਨ| ਉਹਨਾਂ ਨੂੰ ਛੂਤ ਦੇ ਰੋਗਾਂ ਦੇ ਇਲਾਜ ਵਿੱਚ ਮੁਹਾਰਤ ਰੱਖਣ ਵਾਲੇ ਟੋਕੀਓ ਦੇ ਇਕ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ| ਭਾਵੇਂਕਿ ਸਿਹਤ ਮੰਤਰਾਲੇ ਨੇ ਹਾਲੇ ਕਿਸੇ ਵੀ ਯਾਤਰੀ ਦੇ ਵਾਇਰਸ ਨਾਲ ਪ੍ਰਭਾਵਿਤ ਹੋਣ ਦੀ ਪੁਸ਼ਟੀ ਨਹੀਂ ਕੀਤੀ ਹੈ|ਜਾਪਾਨ ਦੀ ਸਰਕਾਰ ਨੇ ਆਪਣੇ ਲੋਕਾਂ ਨੂੰ ਲਿਆਉਣ ਲਈ ਇਕ ਚਾਰਟਰਡ ਜਹਾਜ਼ ਭੇਜਿਆ ਸੀ| ਇਹਨਾਂ ਵਿਚ ਜ਼ਿਆਦਾਤਰ ਜਾਪਾਨੀ ਵੁਹਾਨ ਦੇ ਉਸ ਸੀ-ਫੂਡ ਬਾਜ਼ਾਰ ਦੇ ਨੇੜੇ ਰਹਿੰਦੇ ਸਨ ਜਿੱਥੋਂ ਦੀ ਕੋਰੋਨਾਵਾਇਰਸ ਦਾ ਪਹਿਲਾ ਮਾਮਲਾ ਸਾਹਮਣੇ ਆਇਆ ਸੀ| ਇੱਥੇ ਲਿਆਂਦੇ ਗਏ ਸਾਰੇ ਜਾਪਾਨੀ ਲੋਕਾਂ ਨੇ ਮਾਸਕ ਪਹਿਨੇ ਹੋਏ ਸਨ| ਜਾਪਾਨ ਵਿਚ ਹੁਣ ਤੱਕ ਇਸ ਵਾਇਰਸ ਦੇ 7 ਮਾਮਲੇ ਸਾਹਮਣੇ ਆਏ ਹਨ| ਇਸ ਵਿਚ ਇਕ ਮਾਮਲਾ ਮਨੁੱਖ ਤੋਂ ਮਨੁੱਖ ਵਿੱਚ ਫੈਲੇ ਇਨਫੈਕਸ਼ਨ ਦਾ ਵੀ ਹੈ ਜਿਸ ਵਿੱਚ 60 ਸਾਲ ਦੇ ਇਕ ਟੂਰ ਬੱਸ ਡਰਾਈਵਰ ਨੇ ਵੁਹਾਨ ਤੋਂ 8 ਤੋਂ 16 ਜਨਵਰੀ ਦੇ ਟੂਰ ਤੇ ਆਏ ਚੀਨ ਦੇ ਦੋ ਸੈਲਾਨੀ ਸਮੂਹਾਂ ਨੂੰ ਲਿਆਉਣ-ਲਿਜਾਣ ਦਾ ਕੰਮ ਕੀਤਾ ਸੀ| ਇਸ ਡਰਾਈਵਰ ਵਿਚ 14 ਜਨਵਰੀ ਨੂੰ ਇਹ ਲੱਛਣ ਨਜ਼ਰ ਆਉਣ ਲੱਗੇ ਸਨ|