ਬੈਂਗਲੁਰੂ ਨੂੰ ਹਰਾ ਜੈਪੁਰ ਪਲੇਆਫ ਦੀ ਦੌੜ ਚ ਬਰਕਰਾਰ

ਜੈਪੁਰ ਪਿੰਕ ਪੈਂਥਰਸ ਨੇ ਬੈਂਗਲੁਰੂ ਬੁਲਸ ਨੂੰ ਸ਼ੁੱਕਰਵਾਰ ਖੇਡੇ ਗਏ ਪ੍ਰੋ ਕਬੱਡੀ ਲੀਗ ਦੇ ਮੈਚ ਨੰਬਰ 120 ‘ਚ 41-34 ਨਾਲ ਹਰਾ ਕੇ ਪਲੇਆਫ ‘ਚ ਜਾਣ ਦੀ ਆਪਣੀਆਂ ਉਮੀਦਾਂ ਨੂੰ ਕਾਇਮ ਰੱਖਿਆ ਹੈ। ਜੈਪੁਰ ਦੇ ਲਈ ਇਸ ਮੈਚ ‘ਚ ਦੀਪਕ ਹੁੱਡਾ ਨਹੀਂ ਖੇਡ ਰਹੇ ਸੀ ਪਰ ਦੂਜੇ ਦੀਪਕ ਯਾਨੀ ਦੀਪਕ ਨਰਵਾਲ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਸੁਪਰ-10 ਦੇ ਨਾਲ 16 ਰੇਡ ਪੁਆਇੰਟਸ ਹਾਸਲ ਕੀਤੇ, ਜਦਕਿ ਵਿਸ਼ਾਲ ਨੇ ਹਾਈ ਫਾਈਵ ਪੂਰਾ ਕੀਤਾ। ਬੈਂਗਲੁਰੂ ਵਲੋਂ ਇਕ ਵਾਰ ਫਿਰ ਪਵਨ ਸਹਰਾਵਤ ਨੇ ਸੁਪਰ-10 ਕਰਦੇ ਹੋਏ 14 ਰੇਡ ਪੁਆਇੰਟਸ ਹਾਸਲ ਕੀਤੇ ਪਰ ਆਪਣੀ ਟੀਮ ਨੂੰ ਜਿੱਤ ਹਾਸਲ ਨਹੀਂ ਕਰਵਾ ਸਕੇ। ਪ੍ਰੋ ਕਬੱਡੀ ਇਤਿਹਾਸ ‘ਚ ਜੈਪੁਰ ਦੀ ਬੈਂਗਲੁਰੂ ਬੁਲਸ ‘ਤੇ ਇਹ 13 ਮੈਚਾਂ ‘ਚ 7ਵੀਂ ਤੇ ਇਸ ਸੀਜ਼ਨ ‘ਚ ਪਹਿਲੀ ਜਿੱਤ ਹੈ। ਜੈਪੁਰ ਜਿੱਤ ਦੇ ਨਾਲ ਹੁਣ 57 ਅੰਕਾਂ ਹਾਸਲ ਕਰਕੇ ਨੰਬਰ-7 ‘ਤੇ ਹੈ, ਯਾਨੀ ਪਲੇਆਫ ਦੀ ਆਖਰੀ ਲੜਾਈ ਹੁਣ ਜੈਪੁਰ ਬਨਾਮ ਯੂ. ਪੀ. ਦੀ ਹੋ ਗਈ ਹੈ। ਬੈਂਗਲੁਰੂ ਪਹਿਲਾਂ ਹੀ ਪਲੇਆਫ ‘ਚ ਪਹੁੰਚਿਆ ਹੈ, ਇਸ ਲਈ ਉਸ ਨੂੰ ਇਸ ਹਾਰ ਨਾਲ ਕੋਈ ਅਸਰ ਨਹੀਂ ਪਵੇਗਾ।