ਹਾਂਗ ਕਾਂਗ – ਹਾਂਗ ਕਾਂਗ ਵਿੱਚ ਅੱਜ ਹਜ਼ਾਰਾਂ ਵਾਸੀਆਂ ਨੇ ਚੀਨ ਦੀਆਂ ਨੀਤੀਆਂ ਵਿਰੁੱਧ ਪੁਲੀਸ ਵੱਲੋਂ ਛੱਡੀ ਅੱਥਰੂ ਗੈਸ ਦੀ ਪ੍ਰਵਾਹ ਨਾ ਕਰਦਿਆਂ ਪਾਬੰਦੀਆਂ ਤੋੜਦਿਆਂ ਮਾਰਚ ਕੱਢਿਆ। ਇਹ ਮਾਰਚ ਵਿਸ਼ਵ ਪੱਧਰ ਉੱਤੇ ਹਾਂਗ ਕਾਂਗ ਵਾਸੀਆਂ ਦੀ ਹਮਾਇਤ ਵਿੱਚ ਉਲੀਕੇ ਪ੍ਰੋਗਰਾਮ ਦਾ ਹਿੱਸਾ ਸੀ। ਹਾਂਗ ਕਾਂਗ ਦੇ ਜਮਹੂਰੀਅਤ ਪੱਖੀ ਅੰਦੋਲਨਕਾਰੀਆਂ ਨੇ ਐਤਵਾਰ ਨੂੰ ਚੀਨ ਦੇ ਏਕਾਅਧਿਕਾਰਵਾਦ ਵਿਰੁੱਧ ਵਿਸ਼ਵ ਪੱਧਰ ਉੱਤੇ ਰੈਲੀਆਂ ਕਰਨ ਦਾ ਪ੍ਰੋਗਰਾਮ ਉਲੀਕਿਆ ਸੀ।ਜ਼ਿਕਰਯੋਗ ਹੈ ਕਿ ਇਸ ਅੰਦੋਲਨ ਦਾ ਪ੍ਰਭਾਵ ਕਮਿਊਨਿਸਟ ਚੀਨ ਦੇ 70ਵੇਂ ਜਨਮ ਦਿਨ ਉੱਤੇ ਵੀ ਪੈ ਸਕਦਾ ਹੈ। ਚੀਨ ਨੇ ਸੋਮਵਾਰ ਤੋਂ ਆਪਣੇ 70 ਵੇਂ ਜਨਮ ਦਿਨ ਨੂੰ ਮਨਾਉਣ ਲਈ ਵੱਡੇ ਪੱਧਰ ਉੱਤੇ ਸਭਿਆਚਾਰਕ ਪ੍ਰੋਗਰਾਮ ਉਲੀਕੇ ਹੋਏ ਹਨ। ਇਸ ਮੌਕੇ ਚੀਨ ਦੀ ਫੌਜ ਦੀ ਸਮਰੱਥਾ ਨੂੰ ਦਰਸਾਉਂਦੀ ਫੌਜੀ ਪਰੇਡ ਵੀ ਹੋਵੇਗੀ, ਜੋ ਚੀਨ ਦੇ ਵਿਸ਼ਵ ਪੱਧਰ ਉੱਤੇ ਸੁਪਰ ਪਾਵਰ ਵਜੋਂ ਵਧ ਰਹੇ ਪ੍ਰਭਾਵ ਨੂੰ ਦਰਸਾਏਗੀ। ਇਸ ਤੋਂ ਇਲਾਵਾ ਆਸਟਰੇਲੀਆ, ਤਾਇਵਾਨ ਅਤੇ ਉੱਤਰੀ ਅਮਰੀਕਾ ਵਿੱਚ ਵੀ ਯੋਜਨਾਬੱਧ ਢੰਗ ਦੇ ਨਾਲ ਮਾਰਚ ਹੋਏ ਜਿਨ੍ਹਾਂ ਵਿੱਚ ਚੀਨ ਦੇ ਧੌਂਸਵਾਦ ਦੀ ਨਿਖੇਧੀ ਕੀਤੀ ਗਈ।