ਸੀਨੀਅਰ ਤੇਜ਼ ਗੇਂਦਬਾਜ਼ ਸ਼ਿਖਾ ਪਾਂਡੇ ਨੇ ਸਵੀਕਾਰ ਕੀਤਾ ਕਿ ਟੀ-20 ਵਿਸ਼ਵ ਕੱਪ ਫਾਈਨਲ ਵਿੱਚ ਆਸਟਰੇਲੀਆ ਨੇ ਭਾਰਤ ਨੂੰ ਫੀਲਡਿੰਗ ਹੀ ਨਹੀਂ, ਸਗੋਂ ਹਰ ਵਿਭਾਗ ਵਿੱਚ ਮਾਤ ਦਿੱਤੀ। ਆਸਟਰੇਲੀਆ ਨੇ ਫਾਈਨਲ ਵਿੱਚ ਭਾਰਤ ਨੂੰ 85 ਦੌੜਾਂ ਨਾਲ ਹਰਾ ਕੇ ਪੰਜਵੀਂ ਵਾਰ ਖ਼ਿਤਾਬ ਜਿੱਤਿਆ ਹੈ। ਪਾਂਡੇ ਨੇ ਆਈਸੀਸੀ ਦੀ ਵੈੱਬਸਾਈਟ ’ਤੇ ਲਿਖਿਆ, ‘‘ਅਸੀਂ ਘਬਰਾਏ ਨਹੀਂ। ਇੱਕ ਵਾਰ ਮੈਦਾਨ ’ਤੇ ਉਤਰਨ ਮਗਰੋਂ ਸਹਿਜ ਹੋ ਜਾਂਦੇ ਹਾਂ।’’ ਉਸ ਨੇ ਕਿਹਾ ਕਿ ਬੈੱਥ ਮੂਨੀ (ਨਾਬਾਦ 78 ਦੌੜਾਂ) ਅਤੇ ਐਲਿਸਾ ਹੀਅਲੀ (75 ਦੌੜਾਂ) ਦੇ ਕੈਚ ਛੱਡਣਾ ਭਾਰਤ ਨੂੰ ਮਹਿੰਗਾ ਪਿਆ। ਦੋਵਾਂ ਨੂੰ ਕ੍ਰਮਵਾਰ ਰਾਜੇਸ਼ਵਰੀ ਗਾਇਕਵਾੜ ਅਤੇ ਸ਼ੈਫਾਲੀ ਵਰਮਾ ਨੇ ਜੀਵਨਦਾਨ ਦਿੱਤਾ। ਪਾਂਡੇ ਨੇ ਕਿਹਾ, ‘‘ਜੇਕਰ ਬੱਲੇਬਾਜ਼ਾਂ ਨੂੰ ਇਸ ਤਰ੍ਹਾਂ ਦੇ ਮੌਕੇ ਦਿੱਤੇ ਜਾਣ ਤਾਂ ਉਹ ਦਬਾਅ ਬਣਾਉਣਗੇ ਹੀ। ਇਸ ਦਾ ਸਾਨੂੰ ਖ਼ਮਿਆਜ਼ਾ ਭੁਗਤਣਾ ਪਿਆ। ਸਾਨੂੰ ਤਿੰਨਾਂ ਵਿਭਾਗਾਂ ਵਿੱਚ ਚੰਗਾ ਪ੍ਰਦਰਸ਼ਨ ਕਰਨਾ ਚਾਹੀਦਾ ਸੀ।