ਬ੍ਰਾਜ਼ੀਲ ਦੇ ਰੀਓ ਡੀ ਜਨੇਰੀਓ ਸ਼ਹਿਰ ਦੇ ਇਕ ਹਸਪਤਾਲ ਵਿੱਚ ਅੱਗ ਲੱਗਣ ਕਾਰਨ ਘੱਟ ਤੋਂ ਘੱਟ 11 ਵਿਅਕਤੀਆਂ ਦੀ ਮੌਤ ਹੋ ਗਈ ਅਤੇ ਹਸਪਤਾਲ ਕਰਮਚਾਰੀਆਂ ਨੂੰ ਮਰੀਜ਼ ਬਿਸਤਰੇ ਤੇ ਵ੍ਹੀਲਚੇਅਰਾਂ ਤੇ ਹੀ ਬਾਹਰ ਸੜਕਾਂ ਤੇ ਲਿਆਉਣੇ ਪਏ| ਮ੍ਰਿਤਕਾਂ ਵਿੱਚੋਂ ਕਈ ਬਜ਼ੁਰਗ ਹਨ|ਅੱਗ ਬੁਝਾਊ ਵਿਭਾਗ ਨੇ ਦੱਸਿਆ ਕਿ ਬੈਡਿਮ ਹਸਪਤਾਲ ਵਿੱਚ ਰਾਤ ਭਰ ਅੱਗ ਬੁਝਾਉਣ ਵਿੱਚ ਜੁਟੇ ਰਹੇ ਚਾਰ ਫਾਇਰ ਫਾਈਟਰਜ਼ ਨੂੰ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ ਤੇ ਤਕਰੀਬਨ 90 ਮਰੀਜ਼ਾਂ ਨੂੰ ਦੂਜੇ ਹਸਪਤਾਲਾਂ ਵਿੱਚ ਭੇਜਿਆ ਗਿਆ ਹੈ| ਅੱਗ ਤੋਂ ਬਚਣ ਲਈ ਲੋਕਾਂ ਨੇ ਚਾਦਰਾਂ ਦੀ ਇਕ ਰੱਸੀ ਬਣਾਈ ਤੇ ਬਾਹਰ ਨਿਕਲਣ ਦੀ ਕੋਸ਼ਿਸ਼ ਕੀਤੀ| ‘ਇੰਸਟੀਚਿਊਟ ਆਫ ਫਾਰੈਂਸਿਕ ਮੈਡੀਸਨ’ ਦੀ ਨਿਰਦੇਸ਼ਕ ਗੈਬ੍ਰੀਏਲਾ ਗ੍ਰੇਸ ਨੇ ਦੱਸਿਆ ਕਿ ਜ਼ਿਆਦਾਤਰ ਪੀੜਤਾਂ ਦੀ ਸਾਹ ਘੁੱਟਣ ਕਾਰਨ ਮੌਤ ਹੋ ਗਈ ਕਿਉਂਕਿ ਵਾਰਡ ਵਿੱਚ ਧੂੰਆਂ ਭਰ ਗਿਆ ਸੀ| ਅੱਗ ਲੱਗਣ ਕਾਰਨ ਲਾਈਫ ਸਪੋਰਟ ਸਿਸਟਮ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ ਸੀ| ਇਸ ਕਾਰਨ ਵੀ ਕੁਝ ਮਰੀਜ਼ਾਂ ਦੀ ਮੌਤ ਹੋ ਗਈ| ਪੁਲਸ ਦੀ ਇਕ ਮਹਿਲਾ ਬੁਲਾਰਾ ਕੈਮਿਲਾ ਡੋਨੇਟੋ ਨੇ ਦੱਸਿਆ ਕਿ ਫਾਇਰ ਫਾਈਟਰਜ਼ ਨੇ ਸਵੇਰੇ ਹਸਪਤਾਲ ਵਿੱਚ ਪੁਲੀਸ ਕਰਮਚਾਰੀਆਂ ਦੇ ਜਾਣ ਲਈ ਰਸਤਾ ਬਣਾਇਆ| ਉਹ ਮਾਮਲੇ ਦੀ ਜਾਂਚ ਕਰ ਰਹੇ ਹਨ|