ਮੁਹਾਲੀ – ਫੈਡਰੇਸ਼ਨ ਆਫ ਸੈਲਫ ਫਾਇਨਾਂਸਿੰਗ ਟੈਕਨੀਕਲ ਸੰਸਥਾਵਾਂ (ਐਫਐਸਐਫਟੀਆਈ) ਅਤੇ ਪੰਜਾਬ ਅਨਏਡਿਡ ਕਾਲਜਿਜ਼ ਐਸੋਸੀਏਸ਼ਨ (ਪੁੱਕਾ) ਨੇ ਕੇਂਦਰ ਸਰਕਾਰ, ਮਨੁੱਖੀ ਸਰੋਤ ਵਿਕਾਸ ਮੰਤਰਾਲੇ (ਐਮਐਚਆਰਡੀ), ਨਵੀਂ ਦਿੱਲੀ ਅਤੇ ਆਲ ਇੰਡੀਆ ਕੌਂਸਲ ਫਾਰ ਟੈਕਨੀਕਲ ਐਜੂਕੇਸ਼ਨ (ਏਆਈਸੀਟੀਈ), ਨਵੀਂ ਦਿੱਲੀ ਤੋਂ ਤਕਨੀਕੀ ਕੋਰਸਾਂ ਵਿਚ ਬਿਹਾਰ, ਜੰਮੂ ਅਤੇ ਕਸ਼ਮੀਰ ਅਤੇ ਨੇਪਾਲ ਦੇ ਵਿਦਿਆਰਥੀਆਂ ਲਈ ਦਾਖਲੇ ਲਈ ਆਖਰੀ ਤਰੀਕ 15 ਅਗਸਤ ਤੋਂ 15 ਸਤੰਬਰ ਤੱਕ ਵਧਾਉਣ ਦੀ ਮੰਗ ਕੀਤੀ ਹੈ।ਫੈਡਰੇਸ਼ਨ ਅਤੇ ਪੁੱਕਾ ਦੇ ਪ੍ਰਧਾਨ ਡਾ. ਅੰਸ਼ੂ ਕਟਾਰੀਆ ਨੇ ਕਿਹਾ ਕਿ ਜੰਮੂ-ਕਸ਼ਮੀਰ ਵਿਚ ਧਾਰਾ 370 ਰੱਦ ਕੀਤੇ ਜਾਣ ਕਾਰਨ ਇੰਟਰਨੈਟ / ਮੋਬਾਈਲ ਕੁਨੈਕਸ਼ਨ ‘ਤੇ ਪਾਬੰਦੀ ਅਤੇ ਕਰਫਿਊ ਕਾਰਨ ਘਾਟੀ ਦੇ ਹਜ਼ਾਰਾਂ ਵਿਦਿਆਰਥੀ ਇਸ ਸੈਸ਼ਨ ਵਿਚ ਦਾਖਲੇ ਲਈ ਅਜੇ ਤੱਕ ਕਾਲਜਾਂ ਵਿਚ ਨਹੀਂ ਜਾ ਸਕੇ ਹਨ ।ਇਸੇ ਤੇ ਪੁੱਕਾ ਦੇ ਸੀਨੀਅਰ ਓਪ ਪ੍ਰਧਾਨ ਅਮਿਤ ਸ਼ਰਮਾ ਨੇ ਕਿਹਾ ਕਿ 5 ਅਗਸਤ ਨੂੰ ਪਟਨਾ ਹਾਈ ਕੋਰਟ ਨੇ ਬਿਹਾਰ ਸਰਕਾਰ ਦੇ 5 ਜੁਲਾਈ ਅਤੇ 16 ਜੁਲਾਈ ਦੀ ਨੋਟੀਫਿਕੇਸ਼ਨ ‘ਤੇ ਸਟੇਅ ਆਰਡਰ ਦੇ ਦਿੱਤੇ ਸਨ, ਜਿਸ ਵਿੱਚ ਸਿਰਫ ਨੈਕ ਗ੍ਰੇਡ “ਏ” ਐਨਬੀਏ ਨੂੰ ਪ੍ਰਮਾਣਿਤ ਅਤੇ ਐਨਆਈਆਰਐਫ ਦਰਜਾ ਪ੍ਰਾਪਤ ਸੰਸਥਾਵਾਂ ਨੂੰ ਹੀ ਬਿਹਾਰ ਕ੍ਰੈਡਿਟ ਕਾਰਡ ਸਕੀਮ ਦਾ ਲਾਭ ਦੇਣ ਦੀ ਗੱਲ ਕੀਤੀ ਸੀ ਜਿਸ ਕਾਰਨ ਪੂਰਾ ਮਹੀਨਾ ਵਿਦਿਆਰਥੀਆਂ ਦੇ ਦਾਖਲੇ ਨੂੰ ਲੈ ਕੇ ਵਿਦਿਆਰਥੀਆਂ ਵਿੱਚ ਭੰਬਲਭੂਸਾ ਸੀ।ਪੁੱਕਾ ਦੇ ਉਪ ਪ੍ਰਧਾਨ ਸ. ਗੁਰਫਤੇਹ ਸਿੰਘ ਨੇ ਅੱਗੇ ਕਿਹਾ ਕਿ ਸਿਰਫ ਇਹ ਹੀ ਨਹੀਂ ਬਲਕਿ ਉੱਤਰ ਪੂਰਬ, ਬਿਹਾਰ, ਨੇਪਾਲ ਆਦਿ ਸਮੇਤ ਵੱਖ ਵੱਖ ਥਾਵਾਂ ‘ਤੇ ਆਏ ਹੜ੍ਹਾਂ ਕਾਰਨ ਬਹੁਤ ਸਾਰੇ ਵਿਦਿਆਰਥੀ ਅਜੇ ਤੱਕ ਆਪਣੇ ਰਾਜਾਂ ਤੋਂ ਬਾਹਰ ਨਹੀਂ ਆ ਸਕੇ ਅਤੇ ਦਾਖਲਾ ਨਹੀਂ ਲੈ ਸਕੇ।ਦੱਸਣਯੋਗ ਹੈ ਕਿ ਮਾਨਯੋਗ ਸੁਪਰੀਮ ਕੋਰਟ ਨੇ ਆਪਣੇ ਪਹਿਲੇ ਆਦੇਸ਼ ਵਿੱਚ 15 ਅਗਸਤ ਨੂੰ ਤਕਨੀਕੀ ਕੋਰਸਾਂ ਵਿੱਚ ਵਿਦਿਆਰਥੀਆਂ ਦੇ ਦਾਖਲੇ ਲਈ ਅੰਤਮ ਤਾਰੀਖ ਤਹਿ ਕੀਤੀ ਸੀ ਜਿਸ ਵਿੱਚ ਇੰਜੀਨੀਅਰਿੰਗ, ਫਾਰਮੇਸੀ, ਪ੍ਰਬੰਧਨ, ਆਰਕੀਟੈਕਚਰ, ਪੌਲੀਟੈਕਨਿਕ, ਹੋਟਲ ਮੈਨੇਜਮੈਂਟ ਆਦਿ ਸ਼ਾਮਲ ਸਨ।